الثلاثاء، 22 يناير، 2013

بيان : 80 ثغرة في الدستور التونسي منها 25 عن بعد

شعوب الانترنت تفقّدت مسودّة الدستور الي نشرها المجلس التأسيسي و لقات 80 فصل فيه خلل على جملة 149 فصل يكوّنو الدستور. من بين الفصول الي فيها خلل 25 ترجع بالنضر للقانون العادي. و في هذا اعادة لواحدة من أهم ثغرات الدستور السابق.


علاش الدستور ما لازموش يرجع للقانون؟


1- على خاطر القانون يتبدل. و القانون الّي يرجعله الدستور بالنضر تولي عنده صبغة دستوريّة مسبقة. بلغة اخرى، المحكمة الدستورية باش يصعب عليها الحكم على دستورية هالقوانين المزكّاة بالدستور. الدستور باش يولي ضعيف.

2- على خاطر ما فمّاش علاش. كل فصل من الدستور ينجّم يتدقق اكثر في قوانين من غير ما يلزم الدستو ي يرجع له مسبقا. نص الدستور لازم يكون مستقل لكن مش لازم يدقق كل شيء


ثغراة مهمّة أخرى


- النواب ما عادش اسمهم "نوّاب" و ما عادش ينوبو الشعب. كلمة "نيابة" تنحّت من النصّ الكل. حتى من اسم المجلس الّي ما عادش "مجلس النوّاب" ولّى مجلس الشعب

- بعض الفصول تقول الي لا يمكن تغيير فصول اخرى. هذه الفصول بيدها تنجم تتغير

فصل 16: الحق في الحياة مش مطلق، محدود بقانون

فصل 18: الحق في الحياة الخاصة ممكن يتنحّى من غير اللجوء لقاضي

فصل 35: المواطنين الي ما عندهمش دخل، لازم يدفعو ضرائب

فصل 37: الدولة تضمن المساوات بين الرجل و المراة في الواجبات برك مش في الحقوق

فصل 53: ما تنجمش تشكي بنائب لجرائم ارتكبها وقت الي هو نائب. حتى بعد ما يكمل فترته ما تنجمش

فصل 56: يمكن البرلمان باش يعطي الصلطة التنفيذية للوزير الاول من غير ما يوضّح وقتاش

فصل 90: البرلمان ما ينجمش يسائل الحكومة

فصل 95: الجندي و الا البوليس محمي كان قرر باش يمتثل للاوامر و الا ما يمتثلش

فصل 118: المحكمة الدستورية مش مستقلّة. هي متكونة من 4 اعضاء مقترحين من الرئيس و 20 عضو منبثقين من الاغلبية في البرلمان بطريقة مباشرة او غير مباشرة

فصل 127: هياة الانتخابات منتخبة ل 6 سنوات وقت الي البرلمان منتخب ل 4 سنوات برك. يحبو يتهنّاو على الانتخابات؟

فصل 132: التقسيم الترابي يرجع بالنضر للقانون. ينجم حزب يقسم البلاد تقسيم يخلي مناطق مولية له باش يحافض على كراسيه

فصل 144: ما ننجموش نبدلو الدستور بعريضة


توصياتنا


- فسّخو كل المرجعيات القانونية في الدستور

- صلّحو الفصول الي فيها ثغرات وقت الي تنجمو

- فسّخو كل النصوص الي ما فيهاش توافق في المجلس التأسيسي. الدستور توة يخف


قائمة ملاحضاتنا الكاملة : http://pad.tn/p/r.zP5YJQFyqJqg3RsE



عنوان الاتّصال للصحافة: contact@partipirate.tn
تنبيه: لقد تم الاعتراف بحزبي قراصنة لدى الجمهورية التونسية. و لتفادي كل خلط، نلتمس منكم كر عنوان الموقع الالكتروني للحزب. http://partipirate.tn

هذا رمزنا http://www.partipirate.tn/site/wp-content/themes/pirate/images/logo-ar.pngd7bd4?9d7bd4

كما نذكّر أن صلاح الدين كشك ليس عضوا في حزب القراصنة.